In entir onn pausa per il Chor Rumantsch Zug (CRZ)
 

Pervia da Corona sto era il Chor Rumantsch Zug, sco bia auters chors, fa pausa per sforza. In entir onn senza emprovas, senza occurenzas ed era neginas sentupadas! Quei ei dir e smacca sin la buna luna e quei periclitescha era la buna cuminonza. Egl avegnir ei la continuaziun ed igl agir per il chor ina gronda sfida e da gronda muntadada.  Ils concerts previ a Baar e Rabius havein nus deplorablamein stuiu stuschar sin pli tard. E schizun la radunonza generala ha buca giu liug uonn. Al CRZ maunca aschia ina impurtonta occurenza e la caschun da sentupar e star en cumpignia.
 

Co va ei vinavon ?

La suprastonza sedat tutta breigia e dat impuls per mantener la buna luna e las vuschs. Denton far exercezi a casa e cantar tut persuls, ei buca caussa da mintgin. Per trenar la vusch fan entgins cantadurs meinsvart diever da videos ed auters canals.

 

Tgei manegian nos cantadurs da present sur da la situaziun cun Corona?
Sin nossa pagina d’ internet anfleis Vus naven dal matg 2021 intervestas cun treis cantadurs. Quels interessants discuors dattan ina buna survesta sur da la situaziun persunala ed oravontut sur dil sentiment da mintgin per oz ed igl avegnir (versiun tudestga).

 

Perspectivas pil proxim temps

Nus sperein ch’ei seigi en cuort puspei pusseivel da far emprovas da cant e planisar occurenzas. Secapescha stuein nus en emprema lingia respectar las ordinaziuns dal BAG. Nossa finamira ei denton d’entscheiver cun tuttas activitads sil pli tard suenter las vacanzas da stad (15 d’ uost).